ABŞ Prezidenti Donald Tramp, Venesuela rəhbərliyi ilə 30-50 milyon barel neftin ABŞ-a verilməsi mövzusunda razılığa gəldiklərini elan etdi. Tramp bildirdi ki, bu neftin satışından əldə olunacaq gəlir hər iki ölkə xalqının xeyrinə istifadə ediləcək.
Tramp öz sosial media hesabından etdiyi paylaşımda bu ifadələri işlədib:
“Venesueladakı Müvəqqəti Səlahiyyətlilərin 30-dan 50 milyon barelə qədər yüksək keyfiyyətli və sanksiya tətbiq edilmiş nefti Amerika Birləşmiş Ştatlarına təhvil verəcəyini elan etməkdən məmnunluq duyuram.”
Şirkətlərlə görüş və investisiya planları
Ağ Evin Venesuela məsələsini müzakirə etmək üçün cümə günü ABŞ-ın aparıcı neft şirkətlərinin rəhbərləri ilə iclas keçirməyə hazırlaşdığı qeyd olunur. Tramp administrasiyası uzun müddətdir ki, Venesuelanın böyük, lakin ciddi problemlər yaşayan neft sektorunun Amerika investisiyalarına və texniki biliklərinə daha çox açılması üçün təzyiq göstərir. Məsələyə yaxın mənbələrin verdiyi məlumata görə, toplantıda Exxon, Chevron və ConocoPhillips kimi şirkətlərin nümayəndələrinin iştirakı gözlənilir.
Bölgədəki gərginlik və reaksiyalar
Digər tərəfdən, Karakas rəhbərliyi çərşənbə axşamı verdiyi bəyanatda, Nikolas Maduronun ələ keçirilərək ABŞ-a aparıldığı gecə təşkil edilən ABŞ hərbi əməliyyatında ən azı 24 Venesuela təhlükəsizlik əməkdaşının həyatını itirdiyini açıqlayıb.
Ölkənin müvəqqəti dövlət başçısı Delcy Rodriguez isə Trampın açıqlamalarına sərt reaksiya verib. Xatırladaq ki, Tramp həftənin əvvəlində Rodriguezi xəbərdar edərək bildirmişdi ki, əgər Venesuelanı ABŞ-ın maraqlarına uyğunlaşdırmasa və Amerika enerji şirkətlərinə giriş imkanı yaratmasa, onu Maduronun taleyindən daha pis aqibət gözləyir.
ABŞ Prezidenti Tramp: "Venesueladan 30–50 milyon barel neft alacağıq"
+04
SCOOP News