Mərc və şikə (oyun nəticələrinin öncədən razılaşdırılması) istintaqı çərçivəsində Metehan Baltacı, Mərt Hakan Yandaş və Alassane Ndao "qanunsuz mərc"dən; Murat Sancak "çirkli pulların yuyulması"ndan; Əhməd Okatan isə "şikə"dən həbs edildi. Cəmi 20 nəfər göndərildikləri Növbətçi Sülh Cəza Hakimliyi tərəfindən həbs olunarkən, 18 nəfərə də məhkəmə nəzarəti tətbiq edildi.
İstintaq çərçivəsində dekabrın 5-i səhər erkən saatlarda keçirilən əməliyyatda aralarında Qalatasaray futbolçusu Metehan Baltacı, Fenerbahçə kapitanı Mərt Hakan Yandaş, yüksək liqa hakimi Zorbay Küçük, Adana Dəmirspor İdman Klubunun sabiq prezidenti Murat Sancak və keçmiş futbol hakimi, idman şərhçisi Əhməd Çakarın da olduğu 38 nəfər saxlanılmışdı.
Saxlanılan şübhəlilər dekabrın 6-da ifadələri alınmaq üçün Vatan küçəsindəki İstanbul Təhlükəsizlik Müdiriyyətinə (Polis İdarəsinə) aparılmışdılar. Polisdəki ifadə və digər işləri tamamlanan şübhəlilər bu gün tibbi yoxlamadan keçirildikdən sonra məhkəməyə (ədalət sarayına) sövq edildi.
Xəstəxanaya yerləşdirilən Əhməd Çakar barədəki saxlama qərarı isə səhhəti səbəbilə ləğv edildi.
İstanbul Cümhuriyyət Baş Prokurorluğu, şübhəlilərin məhkəmədəki ifadə işləri tamamlandıqdan sonra Metehan Baltacı, Murat Sancak, Alassane Ndao, Mərt Hakan Yandaş, Əhməd Okatan, Mehmet Emin Katipoğlu və Ümit Kaya'nın da olduğu 29 şübhəlinin həbs edilməsi tələbi ilə, 10 şübhəlinin isə məhkəmə nəzarətinə alınması tələbi ilə Növbətçi Sülh Cəza Hakimliyinə sövq edildiyini bildirdi.