Tramp təhdid etmişdi... Venesuelaya hava hücumu!

Venesuelanın paytaxtı Karakasda şənbə günü səhər erkən saatlarda təyyarə səsləri, güclü partlayışlar və ən azı bir tüstü sütunu müşahidə edilib. Reuters müxbirlərinin verdiyi məlumata görə, şəhərin böyük bir hərbi bazaya yaxın olan cənub hissəsində elektrik enerjisinin verilişi kəsilib.
Hadisələrin yerli vaxtla təxminən saat 02:00-da (Bakı vaxtı ilə 10:00) başladığı bildirilir. CBS müxbiri Cennifer Ceykobs (Jennifer Jacobs) qeyd edib ki, ABŞ Prezidenti Donald Tramp Venesuela ərazisindəki hərbi obyektlər də daxil olmaqla müxtəlif hədəflərə "hücum əmri" verib.
Venesuela hökuməti tərəfindən verilən ilk bəyanatda: "ABŞ uğur qazana bilməyəcək... ABŞ-ın hücumunun məqsədi Venesuelanın neft və faydalı qazıntı ehtiyatlarını ələ keçirməkdir!" – ifadələri yer alıb və ölkədə "milli fövqəladə vəziyyət" elan edildiyi bildirilib.
Madurodan müdafiə əmri
Dövlət başçısı Nikolas Maduro ölkədə artan təhlükəsizlik riskləri ilə əlaqədar olaraq müdafiə qüvvələrinin dərhal yerləşdirilməsi əmrini verib.
Venesuela Xarici İşlər Nazirliyi tərəfindən elan edilən bu qərar paytaxt Karakasda partlayış və silah səslərinin eşidilməsindən sonra qəbul edilib. Maduro ölkənin təhlükəsizliyini təmin etmək məqsədilə bütün müdafiə elementlərinin təcili işə salınması barədə göstəriş verib və ölkədə fövqəladə vəziyyət (OV) elan edildiyini bəyan edib.